Guðlaugur Victor Pálsson einn besti landsliðsmaður Íslands á síðasta ári gæti verið að koma heim í efstu deild. Frá þessu var sagt í Dr. Football í dag.
Guðlaugur Victor er 29 ára gamall en hann leikur með Darmstad í Þýskalandi, ástæður þess að Guðlaugur skoðar heimkomu er persónulegs eðlis.
„Einn besti leikmaður Íslands, ég trúði þessu ekki fyrst. Svo fór skýrslan að taka á sig mynd, það er fjögurra ára samningur sem gæti orðið. Risarnir í Reykjavík eru að berjast um hann, KR leiðir kapphlaupið á móti Val,“ sagði Kristján Óli í þætti dagsins.
Hjörvar Hafliðason sagði málin persónuleg. „Það eru persónuleg mál að hann vill mögulega koma heim, ég tel mig þekkja Gulla aðeins að hann finni lausn til að vera áfram úti.“
Samkvæmt heimildum 433.is hafa lið í Þýskalandi sem teljast stærri en Darmstad haft áhuga á Guðlaugi Victori.