Ríkharð Óskar Guðnason fréttamaður á Stöð2 Sport segir KSÍ skoða það að fá Lars Lagerback sem ráðgjafa yfir báðum landsliðum. Hann segir hann ekki koma til greina sem næsti landsliðsþjálfari karla.
Lagerback hefur verið orðaður við starfið eftir að hann var rekinn frá Noregi í síðustu viku.
„Ég er búinn að heyra, og ég vil meina að þetta sé fínasti heimildamaður sem gaukaði þessu að mér og er tengdur fótboltaheiminum, að Lars verði ekki landsliðsþjálfari. Það er verið að reyna að semja við Lars um að verða einhvers konar ráðgjafi, tæknilegur stjórnandi yfir báðum landsliðunum,“ sagði Rikki í hlaðvarpsþætti á Vísir.is í dag.
Ríkharð sagði Arnar Þór Viðarsson og Eiður Smári Guðjohnsen væru efstir á blaði KSÍ. Eiður framlengdi samning sinn við FH á dögunum um að þjálfa liðið en samkvæmt Rikka G er klásúla í samningi hans.
„Mennirnir sem eru sagðir á óskalista KSÍ eru Arnar Þór Viðarsson og Eiður Smári Guðjohnsen saman. Ég heyrði það að það væri einhvers konar klásúla í samningnum hjá Eiði við FH að hann geti hoppað í þetta verkefni ef það kemur upp.“
Arnar og Eiður Smári stýrðu U21 árs liðinu inn á stórmót á dögunum og virðast vera ofarlega á blaði stjórnar KSÍ.