Jón Þór Hauksson og forystufólk KSÍ mun að öllum líkindum síðar í dag setjast niður og ræða framtíð þjálfarans í starfi. Jón Þór lýkur sóttkví í dag ef niðurstaða úr COVID-19 prófi reynist neikvæð. Samkvæmt heimildum er stefnt að fundi síðdegis í dag til að fara yfir málið.
Meira:
KSÍ búið að taka ákvörðun um að reka Jón Þór áður en fundað er
Eins og fram hefur komið í fjölmiðlum síðustu daga er óvíst með framtíð Jóns Þórs í starfi eftir að hafa komið liðinu inn á Evrópumótið í síðustu viku. Jón Þór gæti misst starf sitt á næstu dögum eftir miður skemmtilega uppákomu í fögnuði liðsins í Ungverjalandi í síðustu viku. Þjálfarinn, starfsfólk KSÍ og leikmenn voru þá að sletta úr klaufunum eftir að stelpurnar höfðu tryggt sig inn á Evrópumótið í Englandi.
Valtýr Björn Valtýsson, útvarpsmaður með þátt sinn Mín Skoðun kallar eftir því að fleiri verði látnir axla ábyrgð, nefnir hann allt starfslið landsliðsins sem var með í för. Áfengi hafi verið haft um hönd í kringum stúlkur sem ekki hafa aldur til að drekka áfengi.
„Það eru svo mörg atriði í þessu máli. Þau eru í búbblu og eru að fara í flug daginn eftir. Það er greinilega ákveðið að veita áfengi. Það er gert. Þarna eru tvær sautján ára stelpur í hópnum og alls fjórar stelpur sem mega ekki fara inn í vínbúð á Íslandi,“ segir Valtýr Björn í þætti sínum og Fótbolti.net fjallaði fyrst um.
Meira:
Stelpurnar hafa lengi viljað losna við Jón Þór úr starfi
„Ég sá frétt á Stöð 2 í gær þar sem var verið að tilgreina aðila sem gætu tekið við. Ian Jeffs var nefndur sem dæmi, hann er aðstoðarþjálfari. Mér finnst hann alveg ‘out’, bara gleymdu því. Hann er hlutaðeigandi í þessu máli.“
Valtýr vill að allt starfslið KSÍ sem var með í þessari ferð beri ábyrgð í þessu máli og nefnir Borghildi Sigurðardóttur, varaformann sem var með í för.
„Hún er varaformaður KSÍ. Ábyrgð þessara aðila og ábyrgð varaformanns KSÍ er bara þónokkuð mikil. Mér finnst þetta lið, sorrí, þetta er búið… bless! Þessir ellefu aðilar eru ábyrgir fyrir þessum hóp, og þarna er varaformaður KSÍ!,“ sagði Valýr Björn
Borghildur Sigurðardóttir vildi ekki ræða málið við Vísir.is. Hlusta má á þáttinn Mín skoðun hérna.