„Mér líður illa,“ voru síðustu orð Diego Maradona þegar hann stóð upp frá matarborðinu heima hjá sér og ætlaði að leggjast í rúmið til að hvíla sig og reyna að ná bata.
Þessi sextugi fyrrum knattspyrnumaður frá Argentínu lést á heimili sínu í Buenos Aires í Argentínu í gær.
Fyrir rúmum tveimur vikum hafði Maradona verið útskrifaður af spítala í borginni eftir að blæðing í heila koma upp. Hann gekkst undir aðgerð og hafði ekki náð bata eftir hana.
Flestir minnast Maradona fyrir magnaða hæfileika hans á knattspyrnuvellinum en líf hans utan vallar var oftar en ekki skrautlegt, kókaín og áfengi notaði Maradona oft í miklu magni og það hafði áhrif á heilsu hans.
Innan vallar er það sigur Argentínu á Heimsmeistaramótinu árið 1986 og hvernig hann tók Napoli upp til skýjanna og gerði liðið að meisturum árið 1987 og 1990 á Ítalíu, sem standa upp úr á ferli hans.
„Mér líður illa,“ voru orðin sem að Maradona sagði við frænda sinn áður en hann fór inn í svefnherbergi sitt í gær. Skömmu fyrir hádegi kom hjúkrunarkona að Maradona þar sem hann hafði látið lífið í rúmi sínu.
Þriggja daga þjóðarsorg hefur verið lýst yfir í Argentínu. „Þú tókst okkur á toppinn, þú gerðir okkur svo glöð. Þú ert sá besti í sögunni,“ sagði Alberto Fernandez forseti Argentínu eftir tíðindin.