„Árið 2020 hefur hins vegar verið frekar glatað ár svo við segjum það bara eins og það er. Þessi skoðun mín litast svo sannarlega af kórónuveirufaraldrinum og öllu því sem honum hefur fylgt. Íþróttalega séð hefur þetta líka verið svekkelsi á svekkelsi ofan þannig séð,“ skrifar jarni Helgason íþróttablaðamaður Morgunblaðsins í Bakverði dagsins í blaðinu.
Bjarni fer yfir árið 2020 sem hefur verið skrýtið eftir að COVID-19 veiran gerði vart við sig. Heimsbyggðin hefur mátt þola skert lífsgæði og íþróttafólk á Íslandi hefur ekki fengið að stunda vinnu sína.
Þá hafa tvær af skærustu goðsögnum íþrótta látið lífið . „Kobe Bryant lést í hræðilegu þyrluslysi í janúar og í gær kvaddi Diego Maradona þennan heim. Tvær goðsagnir sem höfðu svo stórkostleg áhrif á sínar íþróttagreinar að það er erfitt að setja það í orð,“ skrifar Bjarni um andlát þessara tveggja kappa..
Þessi sextugi fyrrum knattspyrnumaður frá Argentínu lést á heimili sínu í Buenos Aires í Argentínu í gær. Fyrir rúmum tveimur vikum hafði Maradona verið útskrifaður af spítala í borginni eftir að blæðing í heila koma upp. Hann gekkst undir aðgerð og hafði ekki náð bata eftir hana.
„Heimsbyggðin var í sárum þegar Bryant lést. Ég man að ég las skilaboð til hans á samfélagsmiðlum sem sitja ennþá í mér. „Ég vissi ekki að fráfall einhvers, sem ég þekkti aldrei né hitti, gæti haft svona mikil áhrif á mig,“ skrifaði þessi ágæti maður. Orð sem eiga vafalaust við um Maradona hjá mörgum líka,“ skrifar Bjarni í Morgunblaðið
Hann heldur svo áfram að tala um vondu hlutina frá árinu. „Hér heima mistókst svo íslenska karlalandsliðinu að tryggja sér sæti á þriðja stórmótinu í röð. Þeir fengu á sig tvö mörk á síðustu fimm mínútum leiksins. Það verður eiginlega ekki meira svekkjandi en það,“ skrifar Bjarni sem ætlar að kveðja árið með stæl.
„Ég var svo gott sem edrú um síðustu áramót. Ég stefni á ölvun um næstu áramót og hver veit nema maður eyði nokkrum tíuþúsundköllum í flugelda, svona til þess að sprengja árið 2020 eitthvað lengst út í rassgat.“
