Diego Maradona, ein skærasta knattspyrnugoðsögn allra tíma, er látinn en sagt er að andlátið sé vegna hjartaslags. Fjölmiðlar víðs vega um heim greina nú frá andláti argentínska knattspyrnukappans.
Maradona var 60 ára gamall þegar hann lést en hann er af mörgum talinn vera besti knattspyrnumaður allra tíma. Hann lék með nokkrum af frægustu liðum heims eins og Barcelona, Napoli, Boca Juniors og Sevilla.
Þá vakti Maradona mikla athygli með landsliðinu sínu en hann skoraði 34 mörk í 91 leik með argentíska landsliðinu. Maradona er hvað frægastur fyrir það sem kallað er „hönd guðs“, þegar hann skoraði með hendinni á HM árið 1986 en Argentína vann mótið það ár.