Um leið og útgöngubann er á enda í Englandi mun fólk aftur geta mætt á knattspyrnuleiki þar í landi. Eftir 2 desember verður fólki leyft að mæta aftur á völlinn, í fyrsta sinn frá því í mars þegar kórónuveiran fór að hafa áhrif á líf fólks.
Frá 2 desember verða svæði í Bretlandi flokkuð eftir smithættu, þau svæði sem eru í 1. flokki geta hleypt 4 þúsund stuðningsmönnum inn á heimavöll sinn. Þau svæði sem eru í 2. flokki fá leyfi fyrir 2 þúsund stuðningsmönnum á heimavöll sinn en þau svæði sem eru í 3. flokki munu ekki geta hleypt fólki á völlinn.
Ljóst er að þetta fyrsta skref mun gleðja marga sem hafa saknað þess að geta ekki mætt á völlinn í tæpa 9 mánuði. Eins og staðan er í dag gætu liðin í Manchester og Liverpool ekki hleypt fólki á völlinn en það getur breyst, tíðni smita fer lækkandi þar.
Þá hafa félög í deildinni fengið minnisblað um að ansi breyttur veruleiki verði fyrir stuðningsmenn. Þeim verði meðal annars bannað að syngja og öskra.
Þá verður bannað að afgreiða áfenga drykki á völlunum ef planið sem nú er í gangi verður samþykkt.