Hjörvar Hafliðason sérfræðingur Dr. Football telur það nánast öruggt að stjórn KSÍ muni ráða Arnar Þór Viðarsson sem næsta landsliðsþjálfara. Arnar var í löngu viðtali við útvarpsþátt Fótbolta.net á X977 um helgina þar sem hann staðfesti áhuga sinn á starfinu.
Arnar hefur vakið athygli í starfi U21 landsliðsþjálfara og sem yfirmaður knattspyrnumála. Í viðtalinu á X977 sagðist hann telja sig geta stýrt A-landsliði karla og verið í starfi yfirmanns knattspyrnumála. „Arnar ætlar sér þetta starf,“ sagði Kristján Óli Sigurðsson um málið
Erik Hamren lét af störfum í síðustu viku en Arnar kom U21 landsliðinu inn í lokakeppni EM, hann gæti ekki fylgt liðinu í lokakeppnina ef hann fær starf A-landsliðsþjálfara.
Arnar var ráðinn inn í starf yfirmanns knattspyrnumála eftir að hann tók við U21 liðinu, starfið var eitt af því sem Guðni Bergsson formaður KSÍ barðist hart fyrir. „Voru það þá ekki mistök hjá Guðna Bergssyni að ráða inn mann með grimman þjálfaradraum í maganum? Núna ef hann fær þetta ekki, ef eitthvað óvænt gerist. Þá fer hann bara í fýlu,“ sagði Hjörvar Hafliðason um stöðu mála.
Hjörvar hefur þó ekki áhyggjur af því að það komi upp. „Hann er 100 prósent næsti landsliðsþjálfari.“