David Beckham er löngu hættur að spila fótbolta en hann hefur sjaldan þénað jafn mikið og nú fyrir það að tengjast fótboltanum.
Beckham gerði á dögunum samning við EA Sports um að vera eitt af andlitum FIFA tölvuleiksins. Fyrir 23 árum var Beckham andlit leiksins og snýr nú aftur.
Samkvæmt enska blaðinu The Mirror fær Beckham 40 milljónir punda fyrir þriggja ára samning við EA Sports. Rúmir 7 milljarðar íslenskra króna fyrir að gera lítið sem ekkert.
Beckham þarf að auglýsa FIFA leikina á samfélagsmiðlum og mæta einstaka sinnum á viðburði sem tengjast leiknum. Það ætti að vera lítið mál þegar þú þénar um 46 milljónir íslenskra króna á viku.
Beckham er nú einnig hluti af leiknum og er hægt að spila sem Beckham í þessum vinsæla leik. „Þetta er auðveldasti peningur sem hann hefur sótt á lífsleiðinni,“ sagði heimildarmaður Mirror um málið.
Beckham átti farsælan feril sem leikmaður en hann lék með Manchester United, Real Madrid, AC Milan, PSG og LA Galaxy. Hann hefur hins vegar sjaldan þénað svona upphæðir fyrir fótboltann.
View this post on Instagram
