Nokkrum leikjum er lokið í 25. umferð norsku úrvalsdeildarinnar í dag. Íslenskir leikmenn voru í eldlínunni með sínum liðum.
Lærisveinar Jóhannesar Þórs Harðarsonar unnu virkilega mikilvægan 1-2 sigur gegn Odd í kvöld. Sigurinn kemur Start upp fyrir Strömsgodset í 13.sæti sem er seinasta örugga sæti deildarinnar. Strömsgodset á leik gegn toppliði Bodo/Glimt í kvöld.
Viðar Ari Jónsson og Emil Pálsson, leikmenn Sandefjord, komu báðir inn á sem varamenn í 3-2 tapi gegn FK Haugesund. Staðan var 2-2 þegar 89. mínútur voru liðnar af leiknum. Á 90. mínútu skoraði Kristoffer Velde, leikmaður Haugesund, sigurmark leiksins. Sandefjord er eftir leikinn í 11. sæti deildarinnar með 28 stig.
Axel Óskar Andrésson, leikmaður Viking, kom inn á sem varamaður á 90. mínútu í 1-2 sigri Viking gegn Sarpsborg 08. Sigurinn kemur Viking upp í 7. sæti deildarinnar með 36 stig.
Alfons Sampsted getur orðið norskur meistari í kvöld með liði sínu Bodo/Glimt, þegar liðið heimsækir Strömsgodset. Jafntefli dugir liðinu til þess að verða norskur meistari.