„Ég var hættur að æfa um mitt síðasta sumar og fannst ágætt að loka þessu bara formlega, og þakka fyrir mig,“ segir Gunnleifur Gunnleifsson í samtali við Vísi.
Hinn 45 ára gamli Gunnleifur er formlega hættur í fótbolta. Hann birti færslu þess efnis á Twitter í dag. Gunnleifur hefur staðið í marki Breiðabliks undanfarin ár. Í sumar var hann spilandi aðstoðarþjálfari. Hann var varamarkmaður en kom ekkert við sögu sem leikmaður.
„Nú er ég kominn í annað og breytt hlutverk. Ég þekki ekkert annað en að vera markmaður svo þetta eru auðvitað mikil tímamót hjá mér. Maður er rétt byrjaður að líta til baka og það rifjast ýmislegt upp, og þetta er fyrst og fremst bara geggjaður tími heilt yfir. Það er ekkert sem stendur sérstaklega upp úr, eins og titlar og slíkt heldur öll þessi dæmi um fólk sem maður hefur kynnst og bardaga sem maður hefur tekið þátt í,“ segir Gunnleifur við Vísi.
Gunnleifur segist fyrst og fremst þakklátur fyrir ferilinn og hvað hann gat verið langur og skemmtilegur.
Gunnleifur heldur þó áfram að starfa hjá Breiðablik. Hann mun meðal annars þjálfa 2., 6. og 8. flokk karla og sinna markmannsþjálfun hjá öllum flokkum.
Gunnleifur spilaði 474 leik á Íslandi, þar af 17 Evrópuleiki. Á Íslandi spilaði hann með HK, KVA, KR, Keflavík, FH og Breiðablik. Erlendis spilaði Gunnleifur með Vaduz í Liechtenstein í svissnesku deildinni.
Gunnleifur var hluti af liði KR sem varð Íslands- og bikarmeistari árið 1999. Árið 2010 varð Gunnleifur bikarmeistari með FH og Íslandsmeistari með þeim árið 2012
Gunnleifur spilaði 26 A-landsleiki á ferli sínum. Hans fyrsti landsleikur var í vináttuleik á móti Möltu sem Ísland sigraði 5-0. Hans síðasti landsleikur var á móti Eistlandi í vináttuleik sem Ísland sigraði 1-0.
Hér má sjá færslu Gunnleifs á Twitter.
Takk fyrir mig🙏🏻 pic.twitter.com/YWCkxaDefp
— gulligull1 (@GGunnleifsson) November 20, 2020
