David Beckham er kominn í baráttuna með enska blaðinu Daily Mail sem hefur hafið herferð sem einblínir á að ræða og rannsaka heilabilun sem knattspyrnumenn verða fyrir.
Rannsóknir undanfarið hafa leitt það í ljós að knattspyrnufólk er í meiri hættu en flestir aðrir til að glíma við heilabilun á seinni árum. Þannig hafa fjöldi knattspyrnumanna í Englandi greinst með heilabilun á eldri árum.
Sir Bobby Charlton goðsögn úr Heimsmeistaraliði Englands frá 1966 greindist á dögunum með heilabilun og þá lést Nobby Stiles fyrrum leikmaður Manchester United á dögunum, hann glímdi einnig við heilabilun.
„Það er á hreinu að þarna eru spurningar sem þarf að fá svör við,“ sagði Beckham um málið og þá herferð sem hann ætlar í með Daily Mail.
Beckham ólst upp við að horfa á þá menn sem nú glíma við heilabilun og er með sorg í hjarta. „Að heyra sögurnar frá fjölskyldunum um áfallið sem heilabilun er fyrir alla, hjartað í mér brotnar við að lesa þetta.“
„Heilabilun rænir fjölskyldumeðlimi frá fólki á hræðilegan hátt, knattspyrnusamfélagið verður að standa saman og verja heilsu leikmanna.“