Íslenska landsliðið átti aldrei möguleika gegn Englandi í síðasta leik Erik Hamren við stýrið í kvöld. Um var að ræða síðasta leik liðsins í Þjóðadeildinni á þessu tímabili. Declan Rice og Masoun Mount skoruðu mörk Englands í fyrri hálfleik en þau hefðu hæglega getað orðið miklu fleiri. Ögmundur Kristinsson sem stóð vaktina í marki Íslands í fyrri hálfleik varði vel.

Phil Foden skoraði þriðja mark leiksins eftir 80 mínútna leik og bætti svo við öðru fimm mínútum síðar með glæsilegu skoti. 4-0 tap staðreynd í kveðjuleik Erik Hamren. Íslenska liðið ógnaði marki Englands einu sinni en Kári Árnason var ekki langt frá því að skora í síðari hálfleik með skalla.

Að leik loknum settist Ari Freyr Skúlason niður á vellinum og felldi tár. Sérfræðingar Stöð2 Sport þeir Davíð Þór Viðarsson og Bjarni Guðjónsson telja að hann hafi spilað sinn síðasta landsleik, þetta ræddu þeir þegar myndavélin var á Ara sem felldi tár og virtist hugsi.

Stórkostlegar af myndir af Ara eftir leik. Fallinn stríðsmaður. Lokar þessu einn á Wembley. Tár á hvarmi.

— Guðmundur Björn (@gudmundurbjorn) November 18, 2020

Ari er 33 ára gamall og hefur spilað 77 landsleiki fyrir Ísland, hann hefur upplifað allt það besta með landsliðinu. Hann var lykilmaður á Evrópumótinu í Frakklandi 2016 en sat að mestu á bekknum á HM í Rússlandi.

Ari Freyr hefur að mestu spilað sem vinstri bakvörður fyrir landsliðið og lest það hlutverk frábærlega.