Georginio Wijnaldum er enn að íhuga það alvarlega að fara frá Liverpool þrátt fyrir að félagið sé búið að bjóða honum nýjan og betri samning.
Hollenski miðjumaðurinn þénar í dag um 75 þúsund pund á viku en samkvæmt fréttum hefur Liverpool boðið honum 105 þúsund pund á viku og þriggja ára samning.
Þessi þrítugi hollenski miðjumaður skoðar hins vegar aðra kosti en Barcelona hafði mikinn áhuga á honum í sumar, þá er Inter tilbúið að fá hann.
Samningur Wijnaldum við Liverpool er á enda næsta sumar og gæti hann farið frítt frá félaginu. „Þið verðið að spyrja Liverpool. Svara þeir þessu ekki?,“ sagði Wijnaldum við fréttamenn í Hollandi nú þegar hann er í landsliðsverkefni.
„Ég get ekkert sagt, ég get ekkert rætt um það hvort það séu viðræður um nýjan samning. Því miður.“