Emmanuel Adebayor, fyrrverandi leikmaður Arsenal, segist hafa hvatt Thomas Partey, til þess að ganga til liðs við sitt fyrrum félag. Partey gekk til liðs við Arsenal í byrjun október.
„Hann sagði mér að það væru félög í Englandi á eftir sér, aðallega Arsenal, Chelsea og Manchester United sem höfðu sýnt honum áhuga og hann bað mig um,“ sagði Adebayor í viðtali sem birtist á YouTube
Adebayor segist hafa ráðlagt Partey að ganga til liðs við Arsenal því það væri gott félag fyrir hann til þess að taka framförum.
„Arsenal er meira en bara knattspyrnufélag, Arsenal er fjölskylda og ég er ánægður með frammistöðu hans hingað til í ensku úrvalsdeildinni,“ sagði Adebayor um Thomas Partey.
Þessi ráðlegging Adebayor kemur þónokkuð á óvart þar sem samband hans og Arsenal hefur verið stormasamt, hann sagðist meðal annars hata félagið í viðtali árið 2018.
Samband Adebayor og Arsenal tók stefnu til hins verra þegar hann var orðinn leikmaður Manchester City. Margir stuðningsmenn Arsenal munu aldrei fyrirgefa leikmanninum fyrir fagnaðarlætin þegar hann skoraði gegn Arsenal í 4-2 sigri Manchester City árið 2009.
Adebayor hljóp þá yfir endilangan völlinn til þess að fagna fyrir framan stuðningsmenn Arsenal.