„Ég er stoltur af öllum leiknum, sérstaklega þegar við fengum á okkur ódýra vítaspyrnu. Danir voru meira með boltann í fyrri hálfleik og við lögðum mikið á okkur varnarlega,“ sagði Erik Hamren á Stöð2 Sport eftir leikinn við Dani í kvöld.
Ísland tapaði á svekkjandi hátt gegn Danmörku í kvöld en Danir skoruðu sigurmark sitt úr vítaspyrnu í uppbótatíma. Hörður Björgvin Magnússon baðaði út höndunum þegar hann stökk upp í skallabolta og boltinn fór í hönd hans. Eriksen skoraði af öryggi og tryggði Dönum sigur.
Danir komust yfir eftir tólf mínútna leik með marki Christian Eriksen úr vítaspyrnu. Dómurinn var umdeildur en Ari Freyr Skúlason var dæmdur brotlegur fyrir litlar sakir. Viðar Örn Kjartansson jafnaði svo leikinn fyrir Ísland þegar um fimm mínútur voru eftir af leiknum, Viðar tók færið sitt vel eftir að hafa komið inn sem varamaður. Viðar fyrsti Íslendingurinn til að skora á Parekn síðan Hermann Gunnarsson gerði það í 14-2 tapinu árið 1967.
Í uppbótartíma kom svo sigurmarkið. „Við vildum vera nær þeim í síðari hálfleik þegar við vorum að pressa, við vorum of langt frá þeim í upphafi leiks.“
Viðar Örn Kjartansson svaraði kallinu eftir áskorun frá Hamren þegar hann var að koma inn sem varamaður. „Við vorum með átta nýja leikmenn í byrjunarliðinu, ég var ánægður með alla í kvöld. Við spiluðum góðan fótbolta í síðari hálfleik. Ég sagði við Viðar að fara inn og skora, hann hlustaði.“
Erik Hamren mun stýra Íslandi í síðasta sinn á miðvikudag gegn Englandi. „Þetta eru frábærir strákar að vinna með, þeir hafa frábært viðhorf. Það voru erfiðir dagar fyrir leikinn, við vorum langt niðri eftir tapið í Ungverjalandi. Þetta var eitt erfiðasta tap sem ég hef upplifað, starfsliðið kom þeim í gírinn fyrir þennan leik. Við vildum vinna leikinn.“