Stærstu stjörnurnar eru yfirleitt ekki í miklum peningavandræðum og því er það nokkuð algengt að þær kaupi íþróttafélög. Nokkrar af stærstu stjörnum heims hafa á undanförnum árum keypt knattspyrnufélög en The Sun tók saman lista yfir frægustu stjörnurnar sem hafa áhuga á því að eiga slík félög. Stjörnur eins og Elton John, Ryan Reynolds og Will Ferrell eru meðal annars á listanum.
Ryan Reynolds
Kanadíska kvikmyndastjarnan Ryan Reynolds, sem er hvað þekktastur fyrir hlutverk sitt í Deadpool myndunum, greindi frá því á árinu að hann ætlaði að reyna að kaupa Wrexham A.F.C. sem leikur í fimmtu efstu deild Englands. Reynolds hyggst taka yfir félagið ásamt félaga sínum Rob McElhenney en ætlun þeirra er að gera liðið að stórliði ásamt því að framleiða heimildarmynd á meðan.
Wrexham er í eigu stuðningsmanna félagsins og munu þeir kjósa um það á næstunni hvort félagið verði selt til Reynolds og McElhenney.
Louis Tomlinson
Poppstjarnan Louis Tomlinson, sem öðlaðist frægð með hljómsveitinni One Direction, gekk til liðs við uppeldisfélag sitt, Doncaster Rovers, sem leikmaður eftir að hann sýndi takta sína í góðgerðarleik með félaginu. Hann spilaði ekki mikið með liðinu en kom þó inn á af bekknum í leik með liðinu árið 2014.
Sama ár vildi Tomlinson kaupa félagið ásamt fyrrum stjórnarformanni félagsins John Ryan. Þeir buðu í félagið sem samþykkti tilboðið þeirra en samningurinn féll niður þegar deildin sagði að þeir félagar væru ekki með viðunandi viðskiptaáætlun.
Natalie Portman
Leikkonan Natalie Portman, sem er hvað þekktust fyrir leik sinn í Star Wars myndunum og hlutverk sitt í Black Swan, er þessa stundina að reyna að koma nýju knattspyrnufélagi á laggirnar. Um er að ræða liðið Angel City en búist er við að liðið muni spila fyrsta leikinn sinn í NWSL-deildinni, efstu deild kvenna í Bandaríkjunum, árið 2022.
Will Ferrell
Gamanleikarinn vinsæli Will Ferrell keypti hlut í Los Angeles FC árið 2016. Liðið leikur í efstu deild karla í Bandaríkjunum, MLS-deildinni, efstu deild karla í Bandaríkjunum. Þegar Ferrell keypti hlutinn í liðinu bjuggust margir við að honum væri ekki alvara með þessu og kom það því einhverjum á óvart þegar hann tók sitt sæti í stjórn félagsins.
Lebron James
Lebron James, einn besti körfuboltaleikmaður allra tíma, keypti hlut í Liverpool árið 2011. James keypti 2% hlut í félaginu á um 5 milljónir punda, um 900 milljónir í íslenskum krónum, en hluturinn var metinn á yfir 24 milljónir punda, um 4,3 milljarða í íslenskum krónum, árið 2019.
Elton John
Sir Elton John, einn frægasti söngvari allra tíma, eignaðist knattspyrnufélagið Watford árið 1976. Hann varð stjórnarformaður og forstjóri knattspyrnufélagsins í kjölfarið og fjármagnaði félagið á næstu árum. Liðið fór upp um þrjár deildir með Elton John í forystunni, alla leið upp í þá efstu.
Hann seldi félagið til Jack Petchey árið 1987 en keypti það svo aftur árið 1997. Í dag á hann ekki meirihluta í félaginu en þó er hann ennþá með fjármuni í því.