Manchester United útilokar það að Cristiano Ronaldo snúi aftur til félagsins næsta sumar eftir tólf ára fjarveru.
Ronaldo hefur verið orðaður við United síðustu daga en Juventus ku vilja losna við hann af launaskrá næsta sumar þegar hann verður 36 ára gamall.
Ronaldo er með 28 milljónir punda í laun á ári (5 milljarðar íslenskra króna) en hann kom til Juventus sumarið 2018 og á tæp tvö ár eftir af samningi sínum. Ronaldo er með fimm sinnum hærri laun en næsti maður hjá Juventus sem er Paulo Dybala framherji frá Argentínu.
Ronaldo fagnar 36 ára afmæli sínu í febrúar en hann hefur verið á meðal bestu knattspyrnumanna í heimi um langt skeið.
Ronaldo varð að stjörnu í herbúðum Manchester United en yfirgaf félagið árið 2009 og gekk í raðir Real Madrid.