Þrír aðilar í U21 árs landsliði Ítalíu greindust með COVID-19 veiruna við komuna til Keflavíkur í gær. Þetta staðfestir ítalska sambandið.
U21 árs lið Ítalíu á leik gegn Íslandi á Víkingsvelli klukkan 15:30 í dag í undankeppni EM.
Um er að ræða tvo leikmenn og einn úr starfsliði Ítala en annar leikmaðurinn er með einkenni. Ítalar segja að allir þessir aðilar hafi farið í skimun á Ítalíu en ekki greinst með veiruna.
Tveir leikmenn Ítala höfðu greinst með veiruna fyrr í vikunni og því voru þeir teknir út úr hópnum. Ítalska sambandið segist nú vinna málið með UEFA og yfirvöldum á Íslandi.
Ekki er öruggt að leikurinn fari fram en frekari upplýsingar eru væntanlegar á næstu klukkustundum.
