„Gleði, léttir og allt þar á milli,“ sagði Erik Hamren landsliðsþjálfari Íslands eftir 2-1 sigur á Rúmeníu í kvöld. Íslenska liðið er komið í úrslitaleik gegn Ungverjalandi um laust sæti á EM næsta sumar.
Hamren brosti sínu breiðasta eftir leikinn þegar hann ræddi við fréttamenn. „Leikur eins og þessi, þetta er himnaríki eða helvíti eftir svona leik. Það er munur á því að vera í himnaríki eða í helvíti, það er gott að vera í himnaríki. Þetta er mikilvægt fyrir KSÍ og leikmennina, frammistaðan var góð. vörnin var frábær hjá öllu liðinu og við skoruðum tvö góð mörk,“ sagði Hamren.
Hamren hafð ekki séð vítaspyrnuna sem Rúmenar fengu, hún var umdeild. „Ég hef ekki séð neitt, ekki rangstöðuna þar sem Alfreð skoraði og ekki vítaspyrnudóminn. Ég sá dóttur mína í Dubai og hún sagði mér að þetta væri ekki vítaspyrna.“
Aron Einar Gunnarsson fyrirliði Íslands fær að vera á landinu til mánudags og nær því leiknum gegn Dönum á sunnudag. „Enginn fer úr hópnum eftir Dana leikinn, Aron fær að vera áfram. Það fer enginn, U21 strákarnir koma. Ég veit ekki með meiðsli,“ sagði Hamren en ólíklegt er að Kári Árnason verði leikfær.
Guðlaugur Victor Pálsson var frábær í leiknum og fékk hrós frá Hamren. „Hann er að taka stöðu hægri bakvarðar og spila hana vel, hann er ekki þarna með félagsliði sínu. Hann er svo sterkur líkamlega, þegar hann notar það þá er hann frábær. Hann sýndi styrk sinn á miðsvæðinu gegn Englandi, hann er með það sem ég vil sjá hjá leikmanni innan vallar.“