Ole Gunnar Solskjær stjóri Manchester United á von á því að Paul Pogba muni á næstu vikum finna sitt besta form. Pogba byrjaði í 5-0 sigri United á Leipzig í Meistaradeildinni.

Franski miðjumaðurinn hafði verið á bekknum í leikjunum á undan. Útskýringar Solskjær voru þær að Pogba væri enn að safna kröftum eftir að hafa fengið COVID-19 veiruna.

„Paul getur gert allt á fótboltavellinum,“ sagði Solskjær um franska miðjumanninn sem á tæp tvö ár eftir af samningi sínum við félagið.

„Hann getur sent boltann langt, komið sér inn í teiginn og tengt saman spilið úti á velli.“

„Hann var virkilega öflugur gegn Leipzig, hann hafði áhrif á leikinn. VIð elskum að sjá hann fara af stað með boltann og hafa áhrif. Hann var lengi frá vegna meiðsla og svo komu veikindin, hann gerir meira eftir því sem formið verður betra.“