Hertar aðgerðir sem eru boðaðar í baráttu við COVID-19 veiruna gætu gert út um þá von KSÍ að geta klárað Íslandsmótin í knattspyrnu. Búist er við að Þórólfur Guðnason sóttvarnarlæknir leggi til í dag að yfirvöld herði aðgerðir.

KSÍ hafði vonast til þess að geta farið af stað með Íslandsmót sín um aðra helgi, búist var við að létt yrði á regluverki yfirvalda í næstu viku. Bakslag virðist hins vegar verið komið í baráttuna.

„Þetta á bara eftir að koma í ljós hvernig þessar aðgerðir verða þá á næstunni og við bíðum bara og sjáum hvernig þær verða. Staðan er ekki góð það er ljóst á sóttvarnalækni, bara slæmar fréttir fyrir okkur öll, samfélagið í heild,“ sagði Guðni Bergsson formaður KSÍ við RÚV.

Runólfur Pálsson, læknir og einn af yfirmönnum Covid-göngudeildar Landspítala sagði á dögunum við Fótbolta.net að leyfa ætti fótbolta enda væri smithættan innan vallar svo gott sem enginn. „Við vitum hvar mesta hættan er á smiti og virðist það ekki tengjast skipulögðu íþróttastarfi. Vandinn er sá að við getum ekki uppfyllt tveggja metra regluna og getum ekki komist hjá snertingu í keppni en á sama tíma vitum við að ef vel er haldið á málum þá er lítið um smit á þessum vettvangi. Það finnst mér gefa tilefni til undanþágu miðað við þá þekkingu sem við höfum.“