Það gæti orðið vandasamt verk fyrir Jurgen Klopp að stilla upp varnarlínu sinni næstu vikur eftir að Fabinho fór meiddur af velli gegn Midtjylland í Meistaradeildinni í gær.
Fabinho hefur fyllt skarð Virgil Van Dijk í síðustu leikjum og gert það með miklum ágætum. Hann virtist togna aftan í læri í leiknum í gær og fór af velli eftir hálftíma.
Fabinho er 27 ára gamall en það kemur í ljós í dag hversu alvarleg meiðsli hans í lærinu eru.
„Þetta var það síðasta sem við þurftum á að halda, ég veit ekki hversu alvarlegt þetta er. Meiðsli aftan í læri eru sjaldnast góð,“ sagði Jurgen Klopp.
„Hann var ekki sárþjáður, hann taldi sig geta spilað áfram en hann gat ekki hlaupið hratt., það er ekki gott.“
„Við sjáum á morgun hversu alvarlegt þetta er þegar hann fer í myndatökur, þetta er ekki gott.“