Það virðist vera sem svo að íslenski unglingalandsliðsleikmaðurinn Ísak Bergmann Jóhannesson sé eftirsóttasti knattspyrnumaður í Evrópu um þessar mundir. Öll stærstu lið Evrópu eru að skoða þennan 17 ára dreng. Liverpool, Manchester United, Juventus og fleiri stórlið hafa sent útsendara til að fylgjast með drengnum leika með Norrköping.

Sænskir fjölmiðlar segja frá því að líkur séu á að Norrköping muni selja Ísak Bergmann í janúar, áhuginn sé slíkur að búast má við tilboði frá stóru félagi.

Þessi jarðbundni drengur frá Akranesi er til umfjöllunar í öllum stærstu miðlum Evrópu en hann ræddi við Aftonbladet um allan þennan áhuga.

Hvað finnst þér um allan þennan áhuga?
Það er skemmtilegt en ég einbeiti mér bara að því að gera vel með Norrköping og við stefnum á að ná Evrópusæti. Það er það sem ég hugsa um á hverjum degi, við ætlum okkur að gera það saman.

Er svona einfalt að hugsa ekki um þetta?
Já, algjörlega. Það eru margir að spyrja mig út í þetta en ég er að einbeita mér að því hjálpa Norrköping að komast í Evrópukeppni, það er mitt stæræsta markmið.

Áttu þér draumalið í Evrópu?
Manchester United er mitt félag en Norrköping er draumaklúbburinn minn, ég bjó í Manchester þegar pabbi lék á Englandi og horfði á marga leiki.

Þú ferð þá ekki til Liverpool?
Það er ekki hægt að segja svoleiðis, þeir spila góðan fótbolta. Manchester City og Liverpool hafa verið frábær.

Jóhannes Kristinn Bjarnason frændi þinn er til reynslu hérna, hvernig er hann?
Við spiluðum fótbolta saman þegar við vorum yngri, ég er glaður að sjá hann hérna í Norrköping. Hann á eftir að verða virkilega góður leikmaður.

Hann tekur við af þér þegar þú ferð til United?
Við sjáum til, það kemur í ljós.