Það vakti mikla athygli árið 2018 þegar Hannes Þór Halldórsson varði vítaspyrnu gegn Argentínu á Heimsmeistaramótinu í fótbolta. Sjálfur Lionel Messi steig á punktinn og Hannes sá við honum.
Eftir leik fór Hannes í viðtal við Eddu Sif Pálsdóttur á RÚV sem ræddi við hann um leikinn og vítaspyrnuna. „Kannski ekkert hans besta víti,“ sagði Edda þegar hún ræddi við Hannes og sumir ákváðu að hneykslast yfir því.
„Hey! Það þarf að verja þessi víti líka,“ sagði Hannes léttur eftir leikinn.
Kom að uppgjöri:
Hannes og Edda Sif voru svo gestir í hinum vinsæla Kviss þætti sem Björn Bragi Arnarson stýrir á Stöð2 um síðustu helgi, þar var málið gert upp. „Fólk var að tala um að þú hafir verið að gera lítið úr Hannesi,“ sagði Björn Bragi léttur og opnaði á umræðuna.
Hannes Þór tók þátt í gríninu með Birni. „Eigum við ekki að segja að hún hafi verið að gera lítið úr íslensku þjóðinni,“ sagði Hannes og brosti.
Edda var ekki á sama máli og sagðist hafa verið að sýna Hannesi virðingu. „Mér fannst ég vera sýna honum virðingu og talaði bara við hann eins og ég myndi tala við Buffon. Hann var mættur á HM í fótbolta og ég vissi ekki að ég ætti að tala við hann eins og aumingja,“ sagði Edda létt.
Hannes hélt þá áfram og sagði. „Íslenska þjóðin er ósammála þessu og ég tel að það sé kominn tímapunktur til að biðja hana afsökunar.“
Umræðuna úr þættinum má sjá hér að neðan
