Forráðamenn IFK Norrköping halda áfram að leita til Íslands að næstu stjörnu fótboltans, Arnór Sigurðsson kom frá ÍA og gerði frábæra hluti áður en hann var seldur til Rússlands. Nú er það Ísak Bergmann Jóhannesson sem er að slá í gegn með IFK Norrköping og öll stærstu lið Evrópu vilja hann.

IFK Norrköping mun að öllum líkindum selja Ísak á næstunni og þá er að finna næstu stjörnu Íslands, Jóhannes Kristinn Bjarnason 15 ára leikmaður KR er til reynslu hjá IFK Norrköping þessa dagana.

Jóhannes og Ísak Bergmann þekkjast vel enda náskyldir frændur, feður þeirra eru bræðurnir Bjarni og Jóhannes Karl Guðjónssynir sem áttu frábæra ferla sem atvinnuenn.

„Hann hefur æft með okkur þessa vikuna, hann er frábær miðjumaður sem getur líka spilað sem framherji,“ sagði Ísak Bergmann um frænda sinn.

„Hann er miklu sterkari en ég var þegar ég var 15 ára,“ sagði 17 ára Ísak Bergmann.

Jóhannes Kristinn fékk tækifæri með KR í aðdraganda mótsins. Stórlið hafa fylgst með framgöngu Jóhannesar um nokkurt skeið þrátt fyrir ungan aldur og í vetur fór hann í heimsókn til Rangers í Skotlandi. Hann æfði einnig með FCK í Danmörku og Genk í Belgíu.