Ole Gunnar Solskjær þarf ekki að óttast um starf sitt hjá Manchester United í bili eftir sigur á Newcastle í ensku úrvalsdeildinni í kvöld.
Eftir 1-6 tap á heimavelli var pressa á United fyrir leikinn en ballið byrjaði ekki vel, Luke Shaw setti boltann í eigið net eftir tveggja mínútna leik.
United tók völdin á vellinum eftir það og var sterkari aðilinn, það skilaði sér í marki frá fyrirliðanum Harry Maguire sem hafði átt erfiða daga en svaraði innan vallar.
United fékk í síðari hálfleik mjög ódýra VAR vítaspyrnu sem Bruno Fernandes klikkaði á. Fernandes gafst ekki upp og kom United yfir á 86 mínútu. Donny van de Beek kom boltanum fram völlinn og þaðan barst hann til Rashford sem lagði boltann snyrtilega á Bruno sem kláraði vel.
Aaron Wan-Bissaka kom svo United í 3-1 með frábæru marki á 90 mínútu leiksins, þrumuskot og stigin þrjú í höfn.
Marcus Rashford bætti svo við fjórða markinu á 96 mínútu eftir laglega sendingu frá Bruno Fernandes. Mikilvæg þrjú stig fyrir United en liðið er með sex stig eftir fjóra leiki.