Það myndaðist skemmtileg fjölskylduflétta í tíufréttum RÚV á miðvikudagskvöldið. Íþróttafréttakonan Eva Benediktsdóttir, systir
íþróttafréttamannsins Guðmundar Benediktssonar, sem er betur þekktur sem Gummi Ben, sagði fréttir af landsleik kvöldsins sem bróðir hennar lýsti á Stöð 2.
Eva hefur starfað á RÚV síðustu ár en hefur undanfarið verið áberandi í íþróttafréttunum.
Í kjölfarið var viðtal við Albert Guðmundsson sem var í byrjunarliði Íslands gegn Belgíu á miðvikudag, hann er sonur Gumma Ben, en langafi hans var Albert Guðmundsson, ráðherra og fyrsti atvinnumaður Íslands í knattspyrnu.
Mamma Alberts yngri, Kristbjörg, er sömuleiðis fyrrverandi afrekskona í knattspyrnu.