Þogrímur Þráinsson starfsmaður íslenska landsliðsins hefur verið á milli tannana á fólki eftir að hann greindist með COVID-19 veiruna á mánudag. Veiruna fékk Þorgrímur á meðan verkefni landsliðsins stóð og allt starfslið landsliðsins fór í sóttkví vegna þess

Fréttablaðið greindi frá því í gær að Þorgrímur hefði gerst sekur um brot á sóttvarnarreglum þegar hann faðmaði leikmenn og starfslið KSÍ eftir sigurinn á Rúmeníu fyrir rúmri viku.

Meira:
Fullyrt að Þorgrímur hafi brotið sóttvarnarreglur með faðmlagi á Laugardalsvelli

Þar var vitnað í reglur UEFA og sagt frá því að Þorgrímur hafi ekki verið á skýrslu í leiknum og því hafi honum ekki verið heimilt að fara inn á leikvöllinn að leik loknum. Nokkrum dögum eftir að Þorgrímur hafði brotið þessar reglur greindist hann með COVID-19 veiruna.

Fréttablaðið heldur áfram að fjalla um málið í blaði sínu í dag og er því haldið fram að Þorgrímur hafi brotið reglur í aðdraganda leiksins þegar hann keyrði tvo leikmenn sem þurftu að fara á sjúkrahús. „Þorgrímur Þráinsson, sem smitaður er af COVID-19, keyrði tvo leikmenn íslenska landsliðsins í myndatöku fyrir leikinn gegn Rúmenum í síðustu viku þrátt fyrir að reglur UEFA leggi til aðskilnað milli starfsmanna og leikmanna,“ segir í frétt Fréttablaðsins um málið.

„Þetta var utan þess tíma sem smit Þorgríms var rakið en leikmennirnir fengu þarna heimild til að fara í myndatöku á heilbrigðisstofnun,“ sagði Víðir Reynisson, yfirlögregluþjónn við Fréttablaðið.