Gylfi Þór Sigurðsson afþakkaði verulega launahækkun í byrjun þessa mánaðar þegar Al Hilal í Sádí Arabíu bauð honum samning. Samkvæmt frétt The Athletic var Everton tilbúið að selja Gylfa.
Tilboðið barst til Gylfa á lokadegi félagaskiptagluggans í upphafi mánaðar en hann hafði ekki áhuga á að fara til Sádí Arabíu samkvæmt fréttinni.
Lið í Sádí Arabíu hafa mikla fjármuni á milli handanna og reyna nú að lokka öfluga leikmenn til sín, það hefur ekki tekist mjög vel en þau halda áfram að reyna.
Gylfa var einn af þeim leikmönnum sem Everton var sagt til í að selja í sumar, eftir mikla eyðslu í nýja leikmenn reyndi félagið að fá inn fjármagn.
Gylfi á tvö ár eftir af samningi sínum við Everton og hefur byrjað tímabilið með miklum ágætum, eftir að hafa verið á bekknum í fyrstu deildarleikjunum byrjaði Gylfi síðasta leik. Everton mætir Liverpool um helgina og verður áhugavert að sjá hvort íslenski landsliðsmaðurinn haldi sæti sínu.
Gylfi sem er 31 árs og hefur átt farsælan feril á Englandi og með íslenska landsliðinu hefur einnig verið orðaður við lið í Bandaríkjunum.