Fullyrt er á forsíðu Fréttablaðsins í dag að Þorgrímur Þráinsson hafi brotið sóttvarnarreglur UEFA þegar hann gekk inn á leikvöllinn þegar Ísland vann sigur á Rúmeníu í umspili um laust sæti á EM í síðustu viku.
Þar er vitnað í reglur UEFA og sagt frá því að Þorgrímur hafi ekki verið á skýrslu í leiknum og því hafi honum ekki verið heimilt að fara inn á leikvöllinn að leik loknum. Nokkrum dögum eftir að Þorgrímur hafði brotið þessar reglur greindist hann með COVID-19 veiruna.
„Samkvæmt reglum UEFA og íslenskum reglum sem KSÍ vinnur eftir er starfsmönnum landsliðsins og leikmönnum ekki heimilt að knúsast og faðmast eftir leiki,“ segir í frétt sem Benedikt Bóas Hinriksson skrifar og birtist á forsíðu Fréttablaðsins í dag.
Með fréttinni er birt mynd af Þorgrími að knúsa Aron Einar Gunnarsson fyrirliða liðsins eftir að Ísland tryggði sér sæti í úrslitaleik um laust sæti á Evrópumótinu. „Þorgrímur braut því reglur UEFA með því að arka inn á völlinn og knúsa þar leikmenn, grímulaus,“ skrifar Benedikt Bóas.
Leikurinn við Rúmeníu fór fram á fimmtudag en Þorgrímur greindist með veiruna snemma á þriðjudag eftir að hafa farið í skimun á mánudag. Sökum þess var allt starfslið Íslands í sóttkví þegar Ísland tapaði gegn Belgíu á heimavelli í gær.