„Þetta var frábært að spila aftur, ógeðslega gaman,“ sagði Ari Freyr Skúlason bakvörður landsliðsins eftir 1-2 tap gegn Belgíu í kvöld í Þjóðadeildinni.
Ísland féll úr A-deild með tapinu en liðið sýndi fína frammistöðu í kvöld. „Við þurfum að horfa á þennan leik og vera stoltir, það hefur mikið gerst á síðustu dögum. Við getum verið stoltir þrátt fyrir tap.“
Sex leikmenn sem höfðu spilað í verkefninu voru ekki með í kvöld og svo var allt starfsliðið sett í sóttkví í gær vegna smits starfsmann. „Við vorum ekki hræddir við slátrun, ég var hræddur um þessa leikmenn sem voru að spila sinn þriðja leik á sex dögum. Birkir Bjarna og félagar, ég var hræddur um það. Við eigum mikilvægan leik gegn Ungverjalandi í næsta mánuði. Það eru allir ógeðslega mikilvægir í þessum hóp.“
Birkir Már Sævarsson liðsfélagi Ara úr Val og landsliðinu snéri aftur á völlinn í kvöld og skoraði. „Hann er æðislegur, hreint ótrúlegur. Hann kom inn eftir langa fjarveru og var frábær, kórónaði góðan leik með marki. Hann segir aldrei neitt og vinnur 100 prósent, það er gott að hafa hann í hópnum þó hann tali ekki mikið.“