Grunur er á smiti af COVID-19 veirunni í kringum íslenska landsliðið frá þessu segir Fótbolti.net nú rétt í þessu. „Skömmu áður en íslenska liðið mætti á æfinguna í morgun var borð með drykkjum leikmanna tæmt og öllum drykkjum hellt niður. Þjálfarateymið fundaði eftir það með Klöru framkvæmdastjóra og öðrum starfsmönnum KSÍ,“ segir í frétt Fótbolta.net.
Þar er haft eftir Klöru Bjartmarz að óstaðfestar grunsemdir væru um smit í umhverfi landsliðsins. Liðið mætir Belgíu í Þjóðadeildinni á morgun.
Ísland hefur spilað tvo leiki á undanförnum dögum og hafa allir leikmenn liðsins farið í próf, allir leikmenn og í kringum hópinn voru prófaðir í gær fyrir leikinn á morgun. Líklegt verður að teljast að óvissa sé með eitthvað prófið þar og niðurstöðu þess.
Þórólfur Guðnason sóttvarnarlæknir lætur hafa eftir sér á Vísir.is að hertar reglur verði áfram í gildi eftir 19 október. Með því væri erfitt fyrir íslenskan fótbolta að fara af stað aftur á næstu vikum.
„Ég held ég verði að sjá núna næstu dagana hvernig þróunin verður en eins og ég hef sagt margoft þá held ég að við verðum að fara mjög hægt í það að aflétta, annars fáum við það bara í bakið aftur og það tekur okkur þá lengri tíma að reyna að ráða að niðurlögum faraldursins aftur,“ segir Þórólfur við Vísi.