„Ég er spenntur fyrir þessum leik, við erum búnir að vera með marga leikmenn meidda. Mjög óheppnir síðustu ár og það er synd að hafa ekki getað stillt upp okkar besta liði í Þjóðadeildinni þar sem andstæðingar okkar eru bestu þjóðir í heimi. Það er fínt að sjá ný andlit og gefur þeim tækifæri á að sanna sig, það eru margir hafa gert það og spilað vel. Vonandi eru þjálfararnir að fá svör við spurningum sínum,“ sagði Birkir Bjarnason landsliðsmaður Íslands á fréttamannafundi fyrir leikinn gegn Belgíu á morgun.
Besta landslið heims mætir þá á Laugardalsvöll í Þjóðadeildinni. „Við stillum upp í hvern leik til að spila vel og gera okkar besta, við vitum að það eru ótrúleg gæði í þessum liðum. Við reynum að læra af þessu og gera betur. Vonandi getum við staðið í þeim, við erum með leikmenn í það.“
„Við erum að spila á móti bestu liðum heims, það ætti að vera leikir sem allir vilja spila. Það þarf enginn að hafa áhyggjur af því að leikmenn séu ekki gíraðir í þetta, það er bara synd að við séum ekki með okkar sterkasta lið.“
Eftir tvo leiki á stuttum tíma hefur Birkir ekki áhyggjur af þreytu hjá sér. Sjö leikmenn hafa yfirgefið hópinn en Birkir mun bera fyrirliðabandið á morgun. „Mér líður mjög vel, ég lít á þetta sem mjög góða stöðu fyrir mig. Fá leiki og mínútur, byggja upp leikæfingu. Þetta er þungur völlur og laus í sér en mér líður vel.“
Birkir hefur ekkert komið við sögu á þessu tímabili með Brescia og sögur á kreiki um að hann gæti farið annað. Óvissa með framtíðina og mikið hefur verið í gangi. „Ég er leikmaður Brescia og þannig er það, var mikil óvissa undir lok félagaskiptagluggans. Glugginn er ekki alveg lokaður alls staðar, þeir tóku þá ákvörðun að spila mér ekki. Í ljós þess að það var mikið í gangi hjá mér persónulega þá var þetta þeirra ákvörðun. Ég er leikmaður Brescia í dag og horfi á það þannig þangað til eitthvað annað gerist,“ sagði Birkir sem gæti farið annað á næstu dögum ef tækifæri gefst til.
Í nóvember fer Ísland í hreinan úrslita leik um laust sæti á EM, andstæðingarnir eru Ungverjar. „Núna fá leikmenn að hvíla sig og vonandi verða allir klárar og í góðu formi í nóvember. Ég sé möguleikana okkar mjög góða, þeir eru með sterkt lið og við höfum mætt þeim áður. Ég myndi segja að okkar möguleikar væru góðir.“