Það er orðið ljóst að það verður mikið breytt landslið sem mætir til leiks þegar Ísland tekur á móti Belgíu í Þjóðadeildinni á miðvikudag.
Gylfi Þór Sigurðsson yfirgaf herbúðir liðsins í dag og Jóhann Berg Guðmundsson hélt til Englands með Gylfa. Aron Einar Gunnarsson er á leið heim til Katar. Jóhann gat ekki leikið í gær en hann fann fyrir eymslum í nára, hann ætti þó að vera leikfær um komandi helgi með Burnley.
Ljóst er að það verður mikið breytt lið sem Ísland stillir upp á miðvikudag gegn besta landsliði í heimi en Kári Árnason, Alfreð Finnbogason, Arnór Sigurðsson og Ragnar Sigurðsson hafa allir meiðst í þessu verkefni.
Erik Hamren mun að öllum líkindum gera ellefu breytingar á byrjunarliði sínu frá leiknum við Rúmeníu á fimmtudag.
Líklegt byrjunarlið Íslands:
Rúnar Alex Rúnarsson
Birkir Már Sævarsson
Hólmar Örn Eyjólfsson
Hjörtur Hermansson
Ari Freyr Skúlason
Jón Dagur Þorsteinsson
Rúnar Már Sigurjónsson
Sverrir Ingi Ingason
Mikael Neville Andersson
Albert Guðmundsson
Kolbeinn Sigþórsson