Hægt er að eignast treyju frá landsliðsmanninum Jóni Daða Böðvarssyni með því að taka þátt í happadrætti á vef Charityshirts.is. Treyjuna notaði Jón Daði í leik gegn Frakklandi á síðasta ári.
Miðinn í lottóinu kostar einungis 1000 krónur og rennur öll upphæðin sem safnast í starf Ljóssins. Dregið verður 12. október.
Ljósið er endurhæfingar- og stuðningsmiðstöð fyrir fólk sem hefur fengið krabbamein og aðstandendur þess. Markmið Ljóssins er að fólk fái sérhæfða endurhæfingu- og stuðning, þar sem fagfólk aðstoðar við að byggja upp líkamlegt og andlegt þrek, auk þess að fá stuðning við að setja sér markmið sem auka daglega virkni og hafa þannig áhrif á lífsgæði almennt.
Ástæða þess að Jón Daði vill styrkja ljósið er sú staðreynd að móðir hans berst nú við krabbamein. „Hann þekkir persónulega þjónustu Ljóssins en mamma hans, Ingbjörg Erna Sveinsdóttir, hefur sótt endurhæfingu í Ljósið samhliða krabbameinsmeðferðum,“ segir á vef Ljósins.
„Í upphafi þessa árs sagði Jón við mömmu sína að hann vildi að Ljósið myndi fá treyju til að bjóða upp og vill hann með þessu framlagi gefa til baka til starfseminnar.“
„Við erum ótrúlega snortin og stolt að Jón Daði vilji styðja starfsemi Ljóssins með þessu móti. Við í Ljósinu erum svo stolt af landsliðinu okkar því er einstaklega ljúft að vita til þess að þar séum við með stuðningsmenn Ljóssins“ segir Erna Magnúsdóttir forstöðukona Ljóssins.
Smelltu hér til að styrkja Ljósið og þar með möguleika á að vinna treyju Jóns Daða