Fjölmargir fréttamenn greina frá því að samkomulag sé undirritað er varðar kaup Manchester United á Bruno Fernandes miðjumanni Sporting Lisbon.
Fréttir bárust í gærkvöldi að samkomulag væri nánast í höfn en félögin hafa nú klárað allt og er Bruno Fernandes á leið í flug til Manchester, búist er við að hann fari i læknisskoðun í kvöld eða í fyrramálið.
United samdi um kaupverðið við Sporting Lisbon í gær og greiðir félagið 46,6 milljónir punda til að byrja. Líklega hækkar sú tala um 8,5 milljónir punda en einnig er klásúla um 12,7 milljónir punda ef United vinnur stóra titla, eins og Meistaradeildina.
Guardian segir frá því að Fernandes muni þéna 70 þúsund pund á viku, rúmar 11 milljónir íslenskra króna. Margir eru hissa á því enda launin ekki svo há í samanburði við aðra leikmenn félagsins, Jesse Lingard, Fred, Nemanja Matic, Phil Jones og Marcos Rojo þéna talsvert meira sem dæmi. Fernandes verður á meðal þeirra sem fær hvað minnst borgað í aðalliði United.
Hjá United þéna Paul Pogba og David de Gea nálægt 300 þúsund pundum á viku eða um 48 milljónir íslenskra króna. Alexis Sanchez er svo sagður vera með 500 þúsund pund á viku, en hann er á láni hjá Inter.
Að auki fær Fernandes bónusgreiðslur fyrir sigra og árangur United.