Markvörðurinn ungi og efnilegi, Brynjar Atli Bragason, hefur gengið til liðs við Breiðablik frá uppeldisfélaginu sínu Njarðvík. Félagið staðfesti þetta rétt í þessu en við sögðum ykkur frá þessu á sunnudag.
Brynjar Atli verður tvítugur á þessu ári og þrátt fyrir ungan aldur á hann að baki yfir 70 leiki með meistaraflokki. Þar að auki hefur hann spilað sex leiki með yngri landsliðum Íslands.
Félagið staðfestir svo þá frétt okkar um að Brynjar verði lánaður fyrir tímabilið en fyrir eru Blikar með Anton Ara Einarsson og Gunnleif Gunnleifsson, nú varamarkvörð og aðstoðarþjálfara Óskars Hrafns Þorvaldssonar.
,,Það er mikið fagnaðarefni fyrir Blika að fá þennan efnilega markvörð til félagsins. Ljóst er að hann getur lært mikið af þeim öflugu markvörðum sem eru fyrir hjá félaginu. Fyrir keppnistímabilið mun Brynjar Atli svo fara á láni til þess að öðlast enn meiri leikreynslu í meistaraflokki,“ segir á vef Blika.