Höskuldur Gunnlaugsson hefur gert þriggja ára samning við Breiðablik í Pepsi-Max deildinni.
Höskuldur spilaði með Blikum síðasta sumar en hann var þá í láni frá félaginu frá Halmstad. Hann kemur á frjálsri sölu.
Ljóst var að leikmaðurinn átti ekki framtíð fyrir sér þar eftir að hafa gengið í raðir liðsins 2017.
Tilkynning Breiðabliks:
Höskuldur heim!
Breiðablik hefur gert 3ja ára samning við Höskuld Gunnlaugsson. Höskuldur sem er 25 ára gamall er uppalinn
Bliki en hann á að að baki 139 leiki með félaginu og hefur skorað í þeim 33 mörk. Höskuldur sló skemmtilega í gegn með Blikaliðinu árin 2016 og 2017 en um mitt sumar 2017 var hann seldur til Halmstad BK í Svíþjóð.
Breiðablik fékk Höskuld á láni síðasta sumar þar sem hann stóð sig frábærlega en hann spilaði nánast alla leiki Blikaliðsins og skoraði 14 mörk í öllum keppnum.
Koma Höskuldar eru frábærar fréttir fyrir Blikaliðiðið en frammistaða hans skilaði sér í sæti í íslenska A-landsliðinu á dögunum þar sem hann átti mjög góðan leik.
„Við erum afskaplega ánægðir að fá Höskuld í okkar raðir. Hann hefur sýnt það að hann er algjör lykilmaður í liðinu, mikill karkater og frábært fordæmi fyrir yngri leikmennina.“ segir Óskar Hrafn Þorvaldsson þjálfari.