Íslenska kvennalandsliðið í knattspyrnu tók á móti því sænska á Laugardalsvelli í kvöld. Leikurinn var liður í undankeppni Evrópumeistaramótsins sem fram fer á Englandi næsta sumar.
Fyrirfram var búist við erfiðum leik fyrir íslenska liðið. Lið Svía lenti í þriðja sæti á heimsmeistaramótinu sem fram fór í fyrra. Ísland og Svíþjóð voru með fullt hús stiga eftir fjóra leiki áður en leikurinn hófst.
Fyrsta mark leiksins leit dagsins ljós á 33. mínútu. Þar var að verki Anna Anvegård. Hún setti boltann snyrtilega í markið eftir undirbúning Sofia Jakobsson. Á 42. mínútu kom Sara Björk Gunnarsdóttir fyrirliði boltanum í netið eftir hornspyrnu Hallberu. Markið var dæmt af. Dómarinn vildi meina að Glódís Perla hafi brotið á markmanni Svía í aðdraganda marksins.
Íslenska liðið virtist eflast við þetta. Dagný Brynjarsdóttir fékk gott tækifæri til að jafna metin undir lok fyrri hálfleiks eftir góða fyrirgjöf frá Sveindísi Jane. Það tókst ekki og staðan í hálfleik 0-1 Svíum í vil.
Ísland jafnaði metin á 61. mínútu. Elín Metta Jensen skoraði með skalla eftir langt innkast frá Sveindísi Jane. Þetta var hennar 16. mark í landsleik númer 51. Lengra komust liðin ekki og tóku eitt stig hvort.
Næsti leikur Íslands í undankeppninni verður einnig á móti Svíþjóð. Leikið verður í Svíþjóð þann 27. október.
Ísland 1 – 1 Svíþjóð
0-1 Anna Anvegård (33′)
1-1 Elín Metta Jensen (61′)