Sky Spors fullyrðir að Manchester United sé nær því í dag en í gær að geta gengið frá kaupum á Jadon Sancho kantmanni Borussia Dortmund í sumar. Félagaskiptaglugginn lokar í byrjun október.

Sancho hefur verið efstur á óskalista Manchester United í sumar en hár verðmiði Dortmund hefur truflað málið. United hefur nú náð samkomulagi við Sancho og umboðsmann hans.

United vill ekki lenda í því að borga of há laun en koma Alexis Sanchez til félagsins reyndist erfitt þegar semja átti við aðra leikmenn, hann var á alltof háum launum.

Sky Sports segir að hjólin í máli Sancho séu byrjuð að snúast og að líkur séu á að United geti keypt hann. Dortmund hefur sagt að Sancho sé ekki til sölu en 109 milljónir punda myndu duga til þess að fá hann.

Sancho var frábær með Dortmund á síðustu leiktíð og vitað er af áhuga hans á að ganga í raðir Manchester United.