KR vann öruggan 8-1 sigur á Vængjum Júpíters í bikarkeppni karla í gær en sigurinn var auðveldur eins og tölurnar bera með sér.
Jóhannes Kristinn Bjarnason 15 ára leikmaður KR fékk sitt fyrsta tækifæri í opinberum leik í gær. Hann skoraði eitt mark og skrifaði þar með í sögubækur KR.
„Jóhannes Kristinn Bjarnason (fyrir miðju) varð í kvöld yngsti markaskorari KR í bikarkeppni KSÍ. Jóhannes er 15 ára og 120 daga en hann sló met Guðmundar Andra Tryggvasonar frá 2015 en Guðmundur Andri var þá 15 ára og 211 daga,“ segir á Twitter vef KR.
Jóhannes fékk tækifæri með KR í aðdraganda mótsins en er aðeins 15 ára gamall. Stórlið hafa fylgst með framgöngu Jóhannesar um nokkurt skeið þrátt fyrir ungan aldur og í vetur fór hann í heimsókn til Rangers í Skotlandi. Hann æfði einnig með FCK í Danmörku og Genk í Belgíu.
Faðir hans, Bjarni Guðjónsson, átti frábæran feril og lék lengi vel erlendis auk þess að verða Íslandsmeistari með KR og ÍA og koma nokkuð við sögu með íslenska landsliðinu.
Jóhannes er klókur miðjumaður en mikið hefur verið látið með kauða frá unga aldri og verður fróðlegt að sjá hvort hann fái fleiri tækifæri með KR í sumar.
Jóhannes Kristinn Bjarnason (fyrir miðju) varð í kvöld yngsti markaskorari KR í bikarkeppni KSÍ. Jóhannes er 15 ára og 120 daga en hann sló met Guðmundar Andra Tryggvasonar frá 2015 en Guðmundur Andri var þá 15 ára og 211 daga #allirsemeinn pic.twitter.com/tdYC1NRU8N
— KR Reykjavik FC (@KRreykjavik) June 23, 2020