Jose Antonio Reyes, lést síðasta sumar í umferðarslysi en lögreglan á Spáni gaf í upphafi árs út skýrslu um slysið. Þessi 35 ára kappi lést í bílslysi í heimalandinu. Reyes var eins og áður sagði aðeins 35 ára gamall og var samningsbundinn liði Extrememadura. Hann átti mjög glæstan feril og er þekktastur fyrir tíma sinn hjá Atletico Madrid og Sevilla.
Enskir knattspyrnuaðdáendur kannast einnig við Reyes sem spilaði með Arsenal frá 2004 til 2007.
Í skýrslu lögreglu kemur fram að Reyes hafi verið á 186 kílómetra hraða og að vinstra afturdekk hafi sprungið, með þeim afleiðingum að hann missti alla stjórn á ökutækinu. Mercedes bifreiðin sem Reyes ók, skall á vegg utan vegar. Með Reyes í för voru tveir frændur hans, annar þeirra lést en hinn lifði af.
Mari móðir hans er enn í áfalli eftir að sonur hennar féll frá í þessu hræðilega slysi. Paco faðir hans ræðir um málið.
„Það er ekki hægt að lýsa sársaukanum, ég fer í kirkjugarðinn á hverjum morgni og aftur heim,“ sagði Paco.
„Við vorum bara alltaf heima, konan mín hefur misst 40 kíló en hefur ekki farið úr húsi í tæpt ár eftir harmleikinn.“