Gylfi Þór Sigurðsson, leikmaður Everton og íslenska landsliðsins var í ítarlegu viðtali við Sky Sports í gær.
Þar ræddi hann um ýmis mál og meðal annars var rifjað upp þegar Ísland vann England á Evrópumótinu í Frakklandi árið 2016. Fræknasti sigur í sögu Íslands varð að veruleika og enska þjóðin var í molum.
„Þetta er eftirminnilegasta stundin á ferlinum, það er klikkun að hugsa að það séu fjögur ár síðan. Mér líður eins og það sé bara eitt og hálft ár, við höfðum trúna á þessu. Í þessu móti þá féll allt með okkur, við höfum mikla trú á okkur og trúum því aldrei að við séum að fara að tapa. Trúin á Evrópumótinu var svakaleg,“ sagði Gylfi
„Fjölmiðlar á Englandi og enska landsliðið hafa alltaf verið eins, það eru alltaf settar miklar kröfur. England hefur átt frábæra leikmenn í gegnum árin, þegar þú mætir lítilli þjóð eins og Íslandi þá áttu von á því að sigra. Við vissum að pressan væri á þeim.“
Pabbi hans margfaldur meistari:
Sigurður Aðalsteinsson, faðir Gylfa er merkilegur karakter. Hann er einn besti pílukastari Íslands og hefur mikinn áhuga á veiðum.
„Hann byrjaði að spila pílu fyrir löngu, þegar það var ekki vinsælt á Íslandi. Hann hefur orðið Íslandsmeistari nokkrum sinnum, hann er með meiri samkeppni núna. Ég hef ekki náð honum, ég fer kannski meira í píluna eftir ferilinn
Sigurður og Gylfi eiga saman litla útgerð í Sandgerði. „Afi var sjómaður, pabbi var sjómaður og ég hef verið að reynda halda honum frá því. Hann elskar það, ég vil sjá hann meira í golfi og pílu.“