Íslenska karlalandsliðið vann mikilvægan sigur í undankeppni EM í kvöld er liðið spilaði við Moldóva.

Ísland var að vinna fjórða leik sinn í riðlakeppninni og er nú með tólf stig eftir fyrstu fimm leikina. Undankeppnin er hálfnuð.

Strákarnir komust yfir á 31. mínútu er Kolbeinn Sigþórsson skoraði með laglegu skoti innan teigs.

Í seinni hálfleik bætti Birkir Bjarnason við öðru marki Íslands og ljóst að stigin væru á leið heim. Jón Daði Böðvarsson skoraði svo  er 13 mínútur voru eftir og lokastaðan 3-0 fyrir Íslandi.

Plús og mínus er hér að neðan.

Plús:

Það er gaman fyrir íslensk knattspyrnuáhugafólk að sjá Jón Daða Böðvarsson og Kolbein Sigþórsson í fullu fjöri. Þeirra fyrsti leikur saman síðan 2016 en geggjaður samleikur í fyrsta markinu, sem Kolbeinn gerði svo vel.

Sigurvegari dagsins er Erik Hamren, hann veðjaði á Kolbein Sigþórsson sem hafði varla spilað fótbolta í þrjú ár. Hann var gagnrýndur, hann hélt áfram að velja Kolbein. Í dag þakkar svo framherjinn öflugi traustið, með góðu marki. Hamren með sigur gegn sófasérfræðingum

Ragnar Sigurðsson er einn hættulegasti sóknarmaður Íslands. Ógnin af honum í teignum er svakaleg, gerði vel í markinu sem Birkir Bjarnason skoraði.

Hjörtur Hermansson komst vel frá sínu í hægri bakverðinum, er að eigna sér stöðuna til framtíðar.

Þroskuð frammistaða er kannski leiðinlegt orð en það var augljóst þegar líða tók á leikinn að liðið ætlaði ekki að eyða meiri orku í leikinn en þurfti. Mikilvægur og erfiður leikur gegn Albaníu, á útivelli á þriðjudag.

Mínus:

Íslenska liðið hefur enn talsvert svigrúm til að bæta leik sinn þegar liðið þarf að stjórna leik eins og í dag. Lið Moldóvu, getur ekki neitt.

Það er sorglegt að sjá ekki fullan Laugardalsvöll þegar íslenska liðið er í dauðafæri á að komast inn á EM, 2020. Sitt þriðja stórmót í röð.