Albert Guðmundsson, leikmaður íslenskal landsliðsins, spilar í dag fyrir hollenska stórliðið AZ Alkmaar.
Albert ákvað að taka skrefið þangað á síðasta ári en hann var áður í vara- og aðalliði PSV Eindhoven sem er risafélag í Evrópu.
Albert var gestur í hlaðvarpsþætti 433.is á dögunum og ræddi þar þessa ákvörðun að skipta um félag.
Þar segir Albert að hann hafi rætt við Marc van Bommel, stjóra PSV, sem sýndi ákvörðuninni fullan skilning.
,,Ég átti eitt ár eftir af samningi og þurfti að vega og meta hvort að það væru leikmenn að fara eða ekki,“ sagði Albert um þá ákvörðun að fara frá PSV.
,,Það voru mörg spurningamerki um hvort fastaleikmenn væru að fara eða ekki. Eins og staðan var þá var enginn að fara og mér fannst ég þurfa að leita á önnur mið.“
,,Ég sagði við Van Bommel að ég ætti eitt ár eftir og að mig langaði ekki að skrifa undir aftur því ég var ekki viss hvað planið væri með mig.“
,,Hann var ekkert að koma í veg fyrir það, hann sagði bara ekkert mál og að það væri skiljanlegt að ég vildi fara einhver til að spila. Ég fór til AZ sem sýndi mér mikinn áhuga.“