Rúnar Kristinsson, þjálfari KR, fékk að lyfta Íslandsmeistarabikarnum í dag er liðið vann FH, 3-2.
KR var búið að tryggja sér titilinn fyrir leikinn í dag en liðið vann flottan 3-2 heimasigur til að fagna titlinum almennilega.
,,Það er alltaf verið að tala um það að menn þurfi að klára mótið með sæmd. Við viljum ekki koma værukærir inn í svona leik gegn góðu liði eins og FH,“ sagði Rúnar.
,,Þessi leikur í dag var líka markmið að vinna að halda heimavellinum taplausum í ár og reyna að kroppa í stigametið sem er 52 stig sem við settum 2013.“
,,Við erum að fara í Kópavoginn og spila við Blikana sem hafa verið sterkir í sumar og eru í öðru sæti. Þetta verður hörkuleikur og ég ætlast til að bæði lið leggi sig fram og sýni fólkinu góðan fótboltaleik,“
Rúnar svaraði svo þeim sögusögnum að hann væri á leið til norska stórliðsins Brann.
,,Nei. Þetta er algjörlega gripið úr lausu lofti. Það hefur ekkert gerst og enginn hefur hringt í mig. Ég var jafn hissa og allir aðrir og jafnvel eins og forráðamenn Brann sem þurftu að svara fyrir þetta. Ég verð bara áfram í KR og er ekki að fara neitt.“