Rúnar Már Sigurjónsson spilaði með FC Astana í kvöld sem mætti Manchester United í Evrópudeildinni.
Astana náði að halda hreinu lengi í kvöld en Mason Greenwood sá svo um að tryggja United sigur.
Rúnar er harður stuðningsmaður United og viðurkennir að stundin hafi verið sérstök í kvöld.
,,Leikurinn spilaðist eins og við bjuggumst við. Við vissum að þeir myndu vera með boltann og markmaðurinn okkar varði vel nokkrum sinnum,“ sagði Rúnar.
,,Í stöðunni 0-0 eða 1-0 þá héldum við alltaf að við gætum skorað eitt mark til að ná í stig en við sköpuðum ekki mikið.“
,,Já og nei [um hvort United hafi verið verri en hann bjóst við] við vissum hvernig þeir myndu spila, þeir notuðu unga leikmenn sem vildu sanna sig og við notuðum okkar leikplan sem virkaði næstum því.“
,,Þetta var sérstakt augnablik fyrir mig og mína fjölskyldu sem var hérna í stúkunni að horfa á mig upplifa drauminn. Ég hefði viljað gefa þeim eitt eða þrjú stig.“