Aron Einar Gunnarsson, fyrirliði Íslands var í viðtali við Brennsluna á FM957 í morgun. Þar ræddi hann lífið í Katar þar sem hann leikur fyrir Al-Arabi.
Aron fluttist til Katar ásamt fjölskyldu sinni í sumar og hefur komið sér vel fyrir. Hann ræddi íslenska landsliðið einnig í viðtalinu.
Þar var hann spurður um leikinn gegn Albaníu í síðustu viku og umræðuna eftir hann. ,,Finnst þér fjölmiðlar á Íslandi alltof neikvæðir?,“ sagði Ríkharð Óskar Guðnason, en Ísland tapaði gegn Albaníu á útivelli.
Aron var fljótur að svara. ,,Nei, nei, alls ekki. Þeir hafa stutt við bakið á okkur, eins og við höfum gefið þeim tíma. Við berum mikla virðingu fyrir öllu því sem er í gangi á Íslandi.“
Aron segir það hluta af því að vera í fremstu röð að fá hrós og gagnrýni. ,,Það er hluti af því að vera í sviðsljósi, þegar það gengur illa þá kemur gagnrýni. Þegar það gengur vel, þá færðu hrós. Það er hluti af því sem við erum að gera.“
Viðtalið við Aron byrjar eftir tæpar 50 mínútur hér að neðan.