Gunnar Heiðar Þorvaldsson veit ekki til þess að hann verði þjálfari ÍBV í haust. Þetta kemur fram á Fótbolta.net í dag.
Kristján Óli Sigurðsson, sérfræðingur Dr Football sagði í gær að Gunnar Heiðar yrði þjálfari ÍBV í haust. Ian Jeffs stýrir nú liðinu.
Gunnar Heiðar lagði skóna á hilluna fyrir tæpu ári og tók sér frí frá fótbolta. Ian Jeffs er aðstoðarþjálfari kvennalandsliðsins, hann á því erfitt með að taka að sér starfið til framtíðar.
„Ég er með það, hver verður þjálfari þarna á næsta ári. Það er einn af dáðustu sonum eyjanna, Gunnar Heiðar Þorvaldsson. Hann tekur við í haust. Það er 99,8% öruggt. Þó svo að maður hafi ekki verið í Eyjum þá var maður með marga heimildarmenn þar og þessu var nánast hent í (Staðfest) svigann upp í brekku á föstudagskvöldið,“ sagði Kristján Óli Sigurðsson oft þekktur sem Höfðinginn í Dr Football.
Gunnar Heiðar segir við Fótbolta.net að það sé óráðið hvað hann geri í haust.
„Það er óráðið. Ég var búinn að lofa því að vera alveg án fótboltans á þessu tímabili og ferðast um Ísland með fjölskyldunni og gera eitthvað allt annað. Síðan sér maður til eftir tímabilið hvernig maður vill hafa þetta og hvort maður komi aftur inn í þetta hjá ÍBV og í hvaða hlutverki maður yrði þá. Það er allt óráðið hjá mér og ég get því miður ekki sagt neitt til um þetta núna,“ sagði Gunnar Heiðar við Fótbolta.net.
ÍBV situr í neðsta sæti Pepsi Max-deildar karla og nánast útilokað að liðið nái að bjarga sér.